Аб візіце беларускай дэлегацыі на чале з Міністрам замежных спраў Беларусі М.Рыжанковым у Гану
06.03.2026 г.3 сакавіка 2026 г. пачаўся першы ў гісторыі двухбаковых адносін працоўны візіт Міністра замежных спраў Рэспублікі Беларусь Максіма Рыжанкова ў Рэспубліку Гана.
Адбылася сустрэча з Прэзідэнтам Рэспублікі Гана Джонам Драмані Махамам.
Перададзена віншавальнае пасланне Прэзідэнта Беларусі А.Р. Лукашэнкі з Днём незалежнасці Ганы, а таксама асабістае запрашэнне наведаць Мінск. Джон Драмані Махама з падзякай прыняў запрашэнне, канкрэтныя даты будуць узгоднены па дыпламатычных каналах. Асноўная ўвага была ўдзелена перспектывам двухбаковага супрацоўніцтва. Прэзідэнт Ганы асабліва выдзеліў сельскагаспадарчы напрамак, прапанаваўшы прапрацаваць праграму ўзаемадзеяння ў аграрным сектары, сёлета чакаецца першы буйны заказ беларускай тэхнікі. Бакі дамовіліся аднавіць рэгулярны палітычны дыялог: правесці кансультацыі паміж знешнепалітычнымі ведамствамі, стварыць сумесную камісію па гандлёва-эканамічным супрацоўніцтве і правесці першае пасяджэнне. Ганскі бок таксама выказаў зацікаўленасць у развіцці ўзаемадзеяння ў галіне барацьбы з тэрарызмам. М.Рыжанкоў пацвердзіў гатоўнасць Беларусі да пашырэння супрацоўніцтва ў сферах адукацыі, ваенна-тэхнічнага ўзаемадзеяння і харчовай бяспекі, зазначыўшы, што Гана ўваходзіць у лік прыярытэтных партнёраў нашай краіны на афрыканскім кантыненце.
4 сакавіка 2026 г. адбылася сустрэча кіраўнікоў знешнепалітычных ведамстваў дзвюх краін. Максім Рыжанкоў і Міністр замежных спраў Ганы Самуэль Акудзета Аблаква ў вузкім і пашыраным складзе абмеркавалі шырокі спектр пытанняў двухбаковага супрацоўніцтва.
Асаблівая ўвага была ўдзелена падрыхтоўцы маючага адбыцца візіту Прэзідэнта Ганы Джона Драмані Махамы ў Беларусь. Бакі разгледзелі зместавае напаўненне візіту і пакет міжнародных дакументаў, якія плануюцца да падпісання. Сярод іх — пагадненні аб бязвізавых паездках па дыпламатычных і службовых пашпартах, аб механізацыі сельскай гаспадаркі, аб экспартных крэдытах, аб стварэнні Міжурадавай камісіі па гандлёва-эканамічным супрацоўніцтве, шэраг іншых дакументаў. Міністры пацвердзілі намер развіваць узаемадзеянне ў палітычнай сферы, сельскай гаспадарцы і супрацьдзеянні тэрарызму. Адзначана важнасць сумесных адукацыйных праграм. Таксама абмяркоўвалася арганізацыя дзелавога і інвестыцыйнага форума ў Мінску з удзелам прадстаўнікоў беларускага і ганскага бізнесу. Асобная ўвага была ўдзелена ўзаемадзеянню на міжнародных пляцоўках.
У той жа дзень адбылася сустрэча з Міністрам гандлю, аграбізнесу і прамысловасці Ганы Элізабэт Офасу-Аджарэ.
Бакі абмеркавалі нарошчванне эканамічнага супрацоўніцтва і рэалізацыю праектаў у сферы механізацыі сельскай гаспадаркі і харчовай бяспекі. Беларусь зацікаўлена ў імпарце ганскай садавіны, арэхаў, агародніны і какава-бабоў, а таксама ў развіцці кааперацыі з улікам членства Беларусі ў ЕАЭС. Ганскі бок прапанаваў прапрацаваць магчымасць стварэння на сваёй тэрыторыі вытворчасцей па перапрацоўцы какавы. М.Рыжанкоў падкрэсліў важнасць падрыхтоўкі комплекснага пакета двухбаковых пагадненняў да візіту Прэзідэнта, уключаючы дакументы аб прадухіленні двайнога падаткаабкладання, абароне інвестыцый і мытным супрацоўніцтве. Дасягнута дамоўленасць аб падрыхтоўцы спісу ганскіх кампаній для ўдзелу ў дзелавым форуме ў Мінску.
У ходзе сустрэчы з намеснікам Міністра харчавання і сельскай гаспадаркі Ганы Джонам Думэлам дэталёва прапрацаваны пытанні харчовай бяспекі і аграрнай кааперацыі.
Беларускі бок прадставіў патэнцыял свайго аграпрамысловага комплексу: магчымасці паставак сухога малака і мяса птушкі, закупак ганскіх какава-бабоў па прамых кантрактах, супрацоўніцтва ў жывёлагадоўлі і раслінаводстве, уключаючы пастаўкі племяннога матэрыялу, камбікармоў і ветэрынарных прэпаратаў. Джон Думэла адзначыў важнасць развіцця цэнтраў механізацыі сельскай гаспадаркі. Ганскі бок падкрэсліў неабходнасць адаптацыі беларускай тэхнікі да мясцовых умоў, уключаючы патрэбнасці дробных фермераў, а таксама развіцця ірыгацыі і стварэння магутнасцей для захоўвання ўраджаю. Абмеркавана падрыхтоўка ганскіх спецыялістаў у аграрнай сферы на базе беларускіх спецыялізаваных навучальных устаноў. М.Рыжанкоў запрасіў ганскую дэлегацыю наведаць выставу «БЕЛАГРА».
У склад беларускай дэлегацыі ўвайшлі намеснік Міністра прамысловасці Рыжкоўскі Л.У., намеснік Міністра сельскай гаспадаркі і харчавання Якаўчыц А.У., саветнік Пасольства Мрочак В.Г, прадстаўнікі МЗС і дзелавых колаў.
